Luke 22

Di haga nohonoho di hai belee daaligi a Jesus

(Matthew 26.1-5; Mark 14.1,2; John 11.45-53)

1Tagamiami di Palaawaa Digi Hagatanga, dela e haga ingoo bolo di Pasoobaa, gu hoohoo mai, ^a 2gei nia dagi hai mee dabu, mo nia gau hagadondonu haganoho e mmaadagu i nia daangada, gei digaula ga halahala di nadau ala hagammuni belee daaligi Jesus gi made.

Judas gu baba bolo e hagi anga a Jesus

(Matthew 26.14-16; Mark 14.10,11)

3Satan ga ulu gi lodo Judas, dela e haga ingoo bolo Iscariot, tangada e dahi i nia dama agoago dilongoholu maa lua a Jesus. 4Judas ga hana gi daha mo digaula, ga helekai ginaadou mo nia dagi hai mee dabu, mo digau aamua ala e hagaloohi di Hale Daumaha i dana hai dela ga hagi anga a Jesus gi digaula. 5Digaula gu tentene bolo ginaadou e hui a mee gi nia bahihadu. 6Gei Judas gu baba, ga daamada ga halahala dana madagoaa humalia dela e hagi anga a Jesus gi digaula i daha mo nia daangada.

Jesus e hagatogomaalia e miami Tagamiami Pasoobaa

(Matthew 26.17-25; Mark 14.12-21; John 13.21-30)

7Di laangi Tagamiami o di Palaawaa Digi Hagatanga ne dae mai, dela di madagoaa e daaligi ai nia damaa siibi o di Pasoobaa. 8Jesus ga hagau a Peter mo John ga helekai, “Hula hagatogomaalia ina Tagamiami Pasoobaa e miami gidaadou.” 9Meemaa ga heeu, “Di gowaa dehee e hiihai ginai goe belee hagatogomaalia?” 10Gei mee ga helekai, “Hula gi lodo di waahale Jerusalem, taane e kae dana loaabi wai ga heetugi adu gi goolua. Daudalia adu a mee loo gi lodo di hale dela e ulu ginai mee, 11helekai gi tangada dono hale boloo: Tangada Agoago ne helekai boloo: Dehee di ruum e miami iei gimaadou mo agu dama agoago i Tagamiami Pasoobaa? 12Gei mee ga hagi adu gi goolua di ruum damana i nua gu togomaalia, deelaa di gulu gowaa e hagatogomaalia gulu mee huogodoo.” 13Meemaa ga hula, ga mmada bolo nia mee huogodoo gu hai be nia helekai a Jesus, gei meemaa ga hagatogomaalia Tagamiami Pasoobaa.

Tagamiami haga muliagina o Tagi

(Matthew 26.26-30; Mark 14.22-26; 1 Corinthians 11.23-25)

14Di aawaa ne dae mai, gei Jesus ga noho i dono lohongo i teebele mo ana dama agoago. 15Gei mee ga helekai, “Au nogo hiihai huoloo belee miami Tagamiami Pasoobaa madalia goodou i mua dogu hagaduadua. 16Idimaa, au e hagi adu gi goodou, bolo au hagalee miami tagamiami deenei, ga dae loo gi di haga modongoohia dono hadinga hagatau i Tenua o God.” 17Jesus ga dahi aga dana ibu, ga danggee ang gi God, ga helekai, “Dahia adu di ibu deenei, hagadau ina i goodou. 18Au e hagi adu gi goodou bolo dolomeenei ga huli gi muli, gei au hagalee e inu nia waini aanei, ga dae loo gi Tenua o God ga dau mai.” 19Gei mee ga dahi aga dana palaawaa, ga danggee ang gi God, ga ginigini haga lligi, ga wanga gi digaula, ga helekai, “Deenei la go dogu huaidina dela e gowadu gi goodou. Heia di mee e haga langalangahia iei au i godou baahi.” 20Muli tagamiami hiahi, gei mee ga wanga di ibu gi digaula, ga helekai, “Di ibu waini deenei go di hagababa hoou a God, ne haga mogobuna gi ogu dodo, ala ga llingi adu gi goodou. ^b 21Mmada, tangada dela e hagi anga au, la i-ginei i teebele dalia au! ^c 22Tama Tangada la ga made gi hai be di manawa o God, gei e huaidu huoloo ang gi tangada dela ma ga hagi anga a mee!” 23Digaula ga daamada ga heheeu i nadau mehanga, ma koai i ginaadou dela ga hai di mee deenei.

Di lagamaaloo be koai dela e aamua

(Mt 18:1; Mrk 9:34; Lk 9:46)

24Di lagamaaloo gu hai i mehanga ana dama agoago be koai e kaedahi e aamua. ^d 25Jesus ga helekai, “Nia king o digau ala e bouli le e mogobuna i hongo nadau daangada, gei digau ala e dagi, le e hai bolo ginaadou go nia hoo hagaaloho o nia daangada. ^e 26Hagalee deenei go di hai e donu e hai go goodou. Gei tangada dela koia e aamua i goodou e hai gi hai be tangada dela e dulii loo i goodou. Gei di tagi le e hai gi hai be di hege ni goodou. ^f 27Koai tangada dela e aamua: go tangada dela e noho i lala e miami, be go tangada dela e hai ana hegau? Ma go tangada dela e noho i lala! Malaa, au dela i godou baahi, le e hai be tangada dela e hai ana hegau. ^g 28Goodou nogo noho i dogu baahi i ogu madagoaa nogo haingadaa. 29Gei au ga gowadu gi goodou di mogobuna e dagi, gadoo be dogu Damana dela ga gaamai di mogobuna deelaa gi di au. 30Goodou ga miami ge inu i dagu deebele i dogu Henua, goodou ga noho i hongo nia lohongo king, e dagi nia madawaawa Israel madangaholu maa lua. ^h

Jesus e haga modongoohia aga di haga de iloo a Peter

(Matthew 26.31-35; Mark 14.27-31; John 13.36-38)

31“Simon! Simon! Hagalongo: Satan la gu kae dana hagadootonu bolo ia e hagamada goodou, e hili digau humalia mo digau huaidu, gadoo be tangada hadagee dela e hili nia lii-‘wheat’ gi daha mo ono gili. 32Gei au gu dalodalo i di goe, Simon, bolo doo hagadonu gi hagalee bagege. Doo madagoaa ma ga huli mai labelaa gi di au, gei goe gi hagamaaloo ina aga oo duaahina ala i golo.” 33Gei Peter ga helekai, “Meenei Tagi, au gu togomaalia e hana madalia goe gi di hale galabudi, ge e made madalia goe!” 34Jesus ga helekai, “Peter, au e hagi adu gi di goe bolo i mua teduu dela ma ga wolo boo nei, gei goe ga helekai haga dolu, bolo goe e de iloo au.”

Di mee dugu hadu, di peege, mo tulumanu daua

35Gei Jesus ga heeu gi ana dama agoago, “Dogu madagoaa ne hagau goodou gei digi kae godou mee dugu hadu, nia peege, be nia suudi, la gu huaidu adu gi goodou?” ⁱ

Digaula ga helekai, “Deeai, Meenei.” 36Jesus ga helekai, “Gei dolomeenei, tangada dela dana mee dugu hadu, be di peege, la gi kae ina. Tangada dela dana hulumanu daua ai, geia gi huia dono gahu mahaa gi daha, e hui dana hulumanu. 37Di Beebaa Dabu e helekai boloo: Mee e dau dalia digau huaidu. Au e hagi adu gi goodou bolo nia helekai aanei la gi kila, idimaa, nia mee ala ne hihi i di au, le e hai gi kila be nia maa.” ^j 38Nia dama agoago ga helekai, “Mmada, meenei Tagi, nia hulumanu e lua aanei.” Gei Jesus ga helekai, “Gu dohu!”

Jesus e dalodalo i di Gonduu Olib

(Matthew 26.36-46; Mark 14.32-42)

39Jesus ga hagatanga i di waahale Jerusalem, ga hana gi di Gonduu Olib be dana hai nogo hai, gei ana dama agoago gu hula madalia a mee. 40Mee ne dau i di gowaa deelaa, gei mee ga helekai gi digaula, “Dalodalo, gi dee too goodou gi lodo nia hagamada.” 41Gei mee ga hana gi tanga gi daha mo digaula, gi mada mogowaa be di mogowaa di hadu ma ga hudu, ga dogoduli ga dalodalo. 42Mee ga helekai, “Tamana, be di maa e baba ginai goe, daawa ina di ibu o di hagaduadua deenei la gi daha mo au. Gei hagalee go dogu hiihai, go doo hiihai le e hai gi hai.” 43Tangada di langi ga haga gida gi mee, ga haga maaloo a mee. 44Mee gu lodo daamaha ge gu dalodalo hagamahi huoloo. Nia hee o maa gu hai be nia madaua dodo e monnono gi hongo di gelegele. 45Mee ga duu i-nua mai dono hai dalodalo, ga hana gi baahi ana dama agoago, ga mmada, gei digaula e kii, gu paagege i nadau lodo huaidu. 46Mee ga helekai gi digaula, “Goodou e kii beleiaha? Noho gi nua, dalodalo, gi dee too hua goodou gi lodo di hagamada!”

Di kuni o Jesus

(Matthew 26.47-56; Mark 14.43-50; John 18.3-11)

47Jesus nogo helehelekai huaigolo gei digau dogologo gu dau mai, e dagi mai go Judas, tangada i dilongoholu maa lua. Mee ne hanaga gi Jesus ga hongi a mee. 48Gei Jesus ga helekai, “Judas, ma di hongi dela e wanga di Tama Tangada?” 49Nia dama agoago ala nogo i baahi o Jesus ga mmada gi di mee dela ga hai, ga heeu, “Meenei Tagi, gimaadou ga hai hegau madau hulumanu daua?” 50Gei tangada e dahi digaula ga tuu gi daha talinga di baahi gau donu o di hege tagi aamua hai mee dabu. 51Jesus ga helekai, “Deelaa hua, gu lawa go di mee deenei!” Mee ga bili gi talinga o taane deelaa, gu hai gi hili gi dono lohongo. 52Gei Jesus ga helekai gi nia dagi hai mee dabu, nia dagi aamua hagaloohi di Hale Daumaha, mo nia dagi mmaadua ala ne loomoi belee kumi a mee, “Goodou ne loomoi mo godou hulumanu mono madaagoo be di mee bolo au tangada gaiaa danga! 53Au nogo i godou baahi i lodo di Hale Daumaha i nia laangi huogodoo, gei goodou digi hai bolo e kumi au e galabudi. Deenei di godou aawaa belee hai hegau ai, i di madagoaa dela e dagi go di mogobuna o di bouli.”

Peter e haga de iloo ia Jesus

(Matthew 26.47-56; Mark 14.43-50; John 18.3-11)

54Digaula ga kumi Jesus, ga lahi gi di hale tagi aamua hai mee dabu, gei Peter ga daudali digaula, e madatanga i daha. 55Di ahi gu akaa i tungaalodo di gowaa daahaa hai gabunga, gei Peter gu madalia digau ala e noho i golo haganiga di ahi. 56Tama ahina hai hegau ga gidee ia a mee e noho i golo, geia ga mmada haga huudonu gi mee, ga helekai, “Taane deenei nogo madalia a Jesus labelaa !” 57Peter ga haga de iloo ia, ga helekai, “Di ahina nei, au e de iloo a mee!” 58Nomuli hua, tuai dangada ga modongoohia ia a Peter, ga helekai, “Goe tangada e dahi i digaula labelaa.”

Gei Peter ga helekai, “Tangada nei, ma hagalee ko au!” 59Holongo di aawaa e dahi nomuli, gei tuai daane ga helekai hagamahi boloo, “E donu bolo taane deenei la nogo madalia a Jesus, idimaa, mee tangada o Galilee labelaa !” 60Gei Peter ga helekai, “Taane nei, au e de iloo be goe e helehelekai bolo aha!”

Di madagoaa hua dela e helehelekai iei mee, gei teduu daane ga wolo. 61Tagi ga huli mai gi muli, ga mmada haga huudonu gi Peter, gei Peter ga langahia ia nia mee a Tagi nogo helekai ang gi deia boloo: Mua hua teduu ma ga wolo boo nei, gei goe ga helekai haga dolu bolo goe e de iloo au.” 62Peter ga hana gi malaelae, mo di dangi wawwawe.

Jesus gu hai hagahuaidu ge dadaaligi

(Matthew 26.67,68; Mark 14.65)

63Nia daane nogo hagaloohi Jesus gu haganneennee Jesus mo di dadaaligi a mee. 64Digaula gu nnoo nia golomada o maa, ga heeu gi mee, “Dongo ina be di maa koai dela ne hagamaawa goe!” 65Digaula gu hai nadau helekai e logo e hagahuaidu a mee.

Jesus i mua digau hai gabunga aamua

(Matthew 26.59-66; Mark 14.55-64; John 18.19-24)

66Ga hooaga luada, gei nia dagi mmaadua mo nia dagi hai mee dabu, mo digau hagadondonu haganoho la ne heetugi i di gowaa e dahi, gei Jesus ga laha mai gi mua digau hai gabunga aamua. 67Digaula ga helekai, “Hagia mai, goe go di Mesaia?”

Jesus ga helekai, “Maa au ga helekai adu bolo au di Mesaia, gei goodou hagalee hagadonu. 68Gei au ga heeu adu dagu heeu, gei goodou hagalee helekai gi dagu heeu. 69Dolomeenei ga huli gi muli, Tama Tangada ga noho i baahi gau donu o God Aamua Huoloo.” 70Gei digaula huogodoo ga helekai, “Goe go Tama a God?”

Gei mee ga helekai, “Goodou ala gu helekai bolo ma ko au.” 71Gei digaula ga helekai, “Gidaadou hagalee bolo gi hai tadau gau haga modongoohia. Gidaadou gu longono ana helekai!”